Di Vincenzo Carrozza
Doppu tantu c’aspettaru
dinta a terra arriggettati
discutiru i vovalaci
du problema di Riaci.
Si cogghiru ammunzelluni
Rretu a porta du patruni
chi nesciu a corna tisi
propriu o centru du paisi.
E schianau a pettu chinu
Supa a petra i nu giardinu
poi finendu di girari
apriu vucca pe parrari:
Vi cridiu ca Lucanu
chistu tipu tantu stranu
risolvia a tempu strittu
lu problema di l’affittu.
Cu stu viziu di Volari
Sindi iru i cosi a mari
Simu essiri ammucciati
chi non vonnu alluminati.
Simu sulu vovalaci
stamu boni nta li straci,
sutta terra e quandu chiovi
nu volimu a cu un di movi.
Mo nesciu a menzu a chilli
unu chinu di garilli
cu coraggiu vinni fora
u si dici na parola.
Rivorgendosi a stu capu
cu lu iatu vaviatu
misurandu li paroli
sempi attentu mu nci coli.
Cu li mbernu chi mo veni
na promessa tu nda fari
non volimu erba sicca
ma na terra grassa e ricca.
Nu volimu acqua assai
u linchimu tutti i strati
u facimu li parati
mu cacciamu i corna e fora.
Mo aspettamu a to parola.
Vi promettu sui santini
Assa anni e gutti chini
Mai cchiu’ niri straviati
chi lavuranu nte strati.
Cu sonagghi di li bandi
Terra grassa e fogghi randi
Vi promettu pe sta Stati
Finu a chi non vi mbarrati.
Acqua, ventu e tempurali
Vi promettu pe Natali
E si voli u bon Gesù
Mari e suli nenti cchiu’.
Vi promettu musicanti
E na festa tantu randi
E nu Santu tuttu nostu
mu vasamu a ferragostu.
Mo vi mandu pedi pedi
Diffonditi chista fedi
Po stipativi nte casi
Finu a quandu non votati.
Stati attenti, e ricordati:
Mo u chiudimu sta facenda
Si facimu fari ammenda
Tridici anni dinta e mura
U si mbarra di paura.
Pemmu gira celli celli
Cusi’ resta sulu pelli
E all’ura u veni fora
Nommu dici na parola.
Chistu fattu di Lucanu
Resta sulu fattu stranu
Simu sulu vovalaci
Ca non vonnu arrisbigghiati!
Foto: ilreggino.it
