A festa d’a Madonna ‘Ddolurata
Di Bruno Versace
Aguannu p’a Madonna ‘Ddolurata
‘nchjanavi a Ferruzzanu n’attra vota;
i prossim’anni vogghj’i tornu mata
fin’a chi gira ‘ddritta la me’ rota.
O Mamma di pietà e di doluri,
i to’ divoti li tenisti cari,
ma ti dassaru sula cu’ Signuri
nt’e ‘vvrazza mortu… e si ndi jiru a ‘mmari.
Dòrman’i morti n’paci a li Chiusetti
e i viventi non vorzaru u to’ latti;
calaru a poch’a vota nt’e casetti
chi jusu a la marina furu fatti.
Ciangi Madonna, ciangi a tutti l’uri,
ciangi e ti ‘mbivi ‘sti gralimi amari,
gocci bruscenti di focu e d’amuri;
quandu ti ‘ccorgi ca non c’è chi fari!
Chiama a campana tutti li matini
ma non cumpari nullhu pammi veni;
non c’esti nullhu nt’a sti sarvaggìni,
non c’è cchju’ nullhu chi ti voli ‘bbeni.
Stasira a li to’ pedi ndi cogghjmu,
‘na vota l’annu mi ti festeggiamu.
Però non cangia nenti. Chi facimu?
‘Na predica, ddu’ verzi… e ndi ndi jamu.
In foto la Beata Vergine Addolorata di Giuseppe Bissoli