Di Francesco Reitano
Distesi virdi ricamati i hjuri
canti d’arcelli e limpidi hjumari
cori cuntenti unchjati d’amuri
e all’orizzonti l’armonia d’u mari;
e ammenz’all’undi azzurri, i piscaturi
pigghjanu pisci o lumi d’i lampari,
mentri i noti i ’na melodia d’amuri
fannu i cornici a sti bellizzi rari.
Cotradi e vecchj, allegri e spenzerati
passijanu squetati ammenz’a via;
nenti ‘ncidenti, spitali, carcerati,
ma soni e balli: ‘na vera camurrìa!
Lapi chi volanu a sciami ‘ndisturbati
rondini chi fannu folì a non finiri
nta nu mundu i rosi profumati
chi non canusci doluri e nno martirii.
Chi bell’ambienti, chi lochi ‘ncantati
senz’odiu, droga e nno pezzenti
senza guerri e sassini spietati;
sulu: ricchizzi, amuri e brava genti.
Nu quatru perfettu chi mi dassa mutu
puntijatu i stilli, e ‘a luna chjna,
nu paesaggiu chi cridia perdutu
architettatu i ‘na manu divina,
nu paradisu celesti… oh chi sdiviju
a tutti l’uri d’a notti e d’u jornu,
chi cosa randi chi campai mu viju;
poi sonau ‘a sveglia, e… finiu ‘u me’ sonnu.
Foto: studioliberamentebg.it
