Di Francesco Reitano
Nu fuji fuji senza cchjù rraggiuni
‘o statu bradu peju di ‘ nimali
‘ a ttesta vascia com’a li muntuni
senza ripenzamenti e nnò ‘deali:
lotti ‘ntestini, scontri virulenti
i n’annu all’attu ammenz’a lli muntagni
armat’i tuttu puntu, fin’e denti
pe ubbidienza a ccui?A li tiranni.
Aundi sunnu cchjù i veri valuri?
Aundi vi criditi d’arrivari?
U rispettu,’a dignità,u ver’amuri
si cunquistanu sulu cu’ sparari?
Chi sunnu st’azioni ‘ndegni;scellerati,
vìpari velenusi e senza cori
ammazzat’e ‘nnocenti strati strati,
pè bbui ‘a vera forza esti u terrori?
Na gara spietata a ccù ‘nd’ammazza cchjuni
cu ogni tipu d’arma e strateggìa
e u populu ‘mpotenti a pizzicuni
rassegnatu aspetta l’agonia.
Sopprusi, sopraffazioni, violenzi, eccidi
p’ò scettru d’ù potiri e d’ù cumandu
pe’ bbui, certu, leggittim’obbiettivi
ma u mundu ‘nteru ormai esti ‘o sbandu.
Mujahedin, pashtun, nordisti e talebani
na lotta ‘mpinita a ccu’ ndi poti cchjuni,
all’urtimu sangu, comu fann’i cani
addestrati ‘a ddoviri d’i patruni.
Chist’è ‘a giustizia vostra, delinguenti?
Stù mundu, st’asprizzi, st’atrocità?
Allura eu non capiscivi nenti;
Ma criju ,manc’u Ddiu vostru, mancu… Allah!
Foto: myindia.it
