Di Francesco Reitano
Si ‘u mundu si sdarrupa i ‘ncollu
e non riesci mancu mu ti sposti,
non aspettari fermu lu tracollu,
cerca mu trovi subitu i risposti.
‘A vita esti nu donu d’u Signuri
nu proggettu fattu ad arti da seguiri
secundu ‘a volontà d’u Redenturi…
cosparsu i rosi frischi e tanti spini:
e’ tutta na matassa da sbrogghjari
rumbulijata i macchji d’odiu e amuri,
sta a ttìa scigghjri chillu chi voi fari
seguiri ‘a luci i Diu o…misteri scuri;
È fatta: i curvi, ‘nchjanati e rettifili
‘mpedimenti d’ogni sorta e sudati,
nu percorsu tuttu quantu da seguiri
si vvoi u cogghji i frutti disijati.
È nu zipangulu a pprova di tassellu,
poi trovari ‘u paradisu oppuru ‘u ‘mpernu
contraddittoria sempi… chistt’è ‘u bellu,
però nu donu preziusu di lu Pataternu.
I l’ostaculi non ti sbarrogari
pè d’ogni mali ci sunnu li curi,
i mali penzeri annegali nt’ò mari
aggrappati sul’a forza dill’amuri.
Foto: keblog.it
