Di Francesco Reitano
Mi guardava fissu e non movia
ed eu scornusu chi l’assecundava
cu n’occhjiu discretu lu seguia
e cu chill’attu ‘a strata occhjulijava.
Chi ffici i mali, disseu e mi guarda fissu
non l’offendia e nn’o guardai i traversu,
o esti n’omu d’un pezzu o esti i gissu
oppuru esti scuntrusu e cuntruverzu.
Chi bboli i mia, mancu ‘u carculai
fazzu pe’ fatti mei u me’ lavuru
e ssi c’u sguardu forzi lu ‘ncruciai
‘u fici casualmenti e, sacciu sulu
ca llù cumportamentu strafuttenti
attirau tutt’a me’ attenzioni
p’o restu non m’importa propiu nenti,
c’u sguardu non mi menti soggezioni.
‘A curiosità, però esti fetusa
e ‘u so’ cumportamentu spudoratu
m’apportau u m’avvicinu cu ‘na scusa
u nci domandu a cchi esti ‘nteressatu,
ma quandu eru difronti e ‘u guardai fissu
‘u toccai c’a manu ed era ‘ncrazzolatu
oramai duru com’o stoccafissu,
d’a commozioni eu, restai ‘mpetratu,
attu ca sgurdu fissu ‘nteressatu,
era mortu i tri jorna, ormai ‘ndurutu,
amarimia restai senza rihjatu
e d’u spaventu puru surdumutu.
Foto: youtube.com
